O‘zbekiston Respublikasi Prezidentining 2024-yil 28-maydagi 195-sonli “2024-yilgi Futzal bo‘yicha Jahon chempionatiga tayyorgarlik ko‘rish va o‘tkazish chora-tadbirlari to‘g‘risida”gi Qaroriga muvofiq 14-sentyabrdan 6-oktyabrga qadar Toshkent, Andijon va Buxoro shaharlarida boʻlib oʻtadigan futzal boʻyicha FIFA Jahon chempionati muxlislari uchun jamoat transporti bepul boʻladi. Bu haqda O‘zbekiston Transport vazirligi matbuot xizmati ma’lum qildi.
Jahon chempionati uchun akkreditatsiyadan o‘tgan shaxslar, mundial o‘yinlariga chiptalari mavjud bo‘lgan xorijiy va mahalliy muxlislar uchun temir yo‘l chiptalariga 50 foiz miqdorida chegirmalar joriy etiladi.
Jumladan, jahon chempionatiga akkreditatsiyadan o‘tgan va o‘yin kunlari chiptalari mavjud bo‘lgan shaxslar shahar jamoat transportidan bepul foydalanishlari mumkin. Buning uchun siz akkreditatsiya kartalari yoki chiptalarni taqdim etishingiz kerak.
Shuningdek, 10-sentyabrdan 10-oktyabrga qadar “Toshkent – Buxoro”, “Toshkent – Andijon – Toshkent”, “Andijon – Buxoro – Xiva – Andijon”, “Andijon – Buxoro – Qo‘ng‘irot” – Andijon” va “Andijon – Termiz – Andijon” yo‘nalishlarida harakatlanuvchi yo‘lovchi poyezdlarga qo‘shimcha 4 tadan yo‘lovchi vagonlari ulanadi.
FIFA Futzal Jahon chempionati chiptalarini futsal2024.uz saytidan istalgan toʻlov usullari orqali xarid qilishingiz mumkin.