2020-yilning 22-aprel kuni oʻzbek futbolining afsonalaridan biri, “Paxtakor” tarkibida ajoyib oʻyinlari bilan ishqibozlar mehrini qozongan Vilgelm Qahhorov vafot etdi.

1938-yil 5-avgust kuni Toshkent shahrida tugʻilgan Vilgelm Qahhorov “Paxtakor” tarkibida 4 mavsum davomida, 1961-64 yillarda oʻynagan. Chempionat uchrashuvlarida 64 bahsda 4 gol muallifiga aylangan. Ishonchli oʻyinlari sababli muxlislarning sevimli futbolchilaridan biriga aylangan va SSSR olimpiya terma jamoasi murabbiylari eʼtiborini tortgan. 1962-yil oliy ligada 6-pogʻona egallangan mavsumda barcha bellashuvlarda maydonga tushgan. 1963-yil Toshkentda Yaponiya milliy terma jamoasiga qarshi oʻrtoqlik oʻyinida gʻalaba keltirgan yagona gol muallifiga aylangan.

Uning butun hayoti futbol bilan bogʻliq boʻldi. Hayotining oxirgi yillarida turli tadbirlarda ishtirok etib, futbolning ommaviyligi uchun oʻz hissasini qoʻshdi.