Bugun Toshkent shahridagi “Hilton” mehmonxonasida yangi tuzilayotgan Oʻzbekiston futzal federatsiyasining taqdimot marosimi o‘tkazildi.
Tadbir avvalida OʻFA hamda OʻzPFL futzalni rivojlantirishni yangi bosqichga olib chiqish, shuningdek, mini-futbol va sohil futbolini aholi orasida ommalashtirish va rivojlantirish maqsadida ularni yagona tuzilmaga birlashtirishga qaror qilingani qayd etildi.
OʻFA Bosh kotibi Avaz Maksumov soʻz olib, joriy yilning 17-dekabr kuni Oʻzbekiston futzal federatsiyasini tashkil etish maqsadida uning taʼsis yigʻilishi oʻtkazilgani yuzasidan maʼlumot berdi.
Yigʻilishda OʻFA va OʻzPFL rahbariyati ishtirok etib, Oʻzbekiston futzal federatsiyasining Ustav loyihasi hamda Ijroiya qoʻmita aʼzolari aʼzolari tasdiqlanganligi, shundan soʻng, tashkilotning taʼsis hujjatlari belgilangan tartibda Oʻzbekiston Respublikasi Adliya vazirligidan roʻyxatdan oʻtkazish uchun taqdim etilgan.
OʻFA prezidenti Abdusalom Azizov soʻzga chiqib, davlatimiz rahbari tomonidan futbolga, xususan futzalga katta e’tibor berilayotganini aytib oʻtdi. FIFA tomonidan Jahon chempionati yurtimizga ishonib topshirilgani va davlatimizning gʻamxoʻrligi bilan musobaqa yuqori saviyada tashkil etilganini qayd etdi.
Jamoamiz musobaqada muvaffaqiyatsiz ishtirok etdi. Bu esa futzalni rivojlantirish va yangi bosqichga olib chiqish zarur ekanligini koʻrsatib berdi. Mazkur masala assotsiatsiyada koʻp marotaba oʻrganib chiqildi, dedi OʻFA rahbari.
2025-yildan eʼtiboran faoliyatini boshlaydigan Oʻzbekiston futzal federatsiyasi prezidenti etib respublikamizda futbol va futzal sport turlarining rivojlanishiga oʻzining munosib hissasini qoʻshib kelayotgan, aholi, ayniqsa, yoshlar oʻrtasida sogʻlom turmush tarzini keng targʻib qilishda faollik koʻrsatayotgan, yurtimizning faol tadbirkorlaridan biri, BMB Xolding kuzatuv kengashi raisi Bekzod Akmalovich Mamatqulov nomzodi maʼqullandi.
• Bekzod Mamatqulov — federatsiya prezidenti;
• Aziz Akbarjonov — vitse-prezident;
• Ma’rufjon Abdullayev — bosh kotib.
Tadbir davomida futzal boʻyicha terma jamoamizning keyingi Jahon chempionatlarida munosib ishtirok etishiga tilak bildirildi.
