Oʼzbekiston Respublikasi Oliy Majlisi Senati aʼzosi, Oʼzbekiston Milliy Olimpiya Qoʼmitasi hamda Oʼzbekiston futbol federatsiyasi sobiq prezidenti Mirabror Zufarovich Usmonov oʼtgan yilning 15-mart kuni, 71 yoshida vafot etgan edi.

Oʼz ishining chin fidoiysi sifatida katta hurmatga sazovor boʼlgan Mirabror Zufarovich oʼzbek futbolining rivoji yoʼlida ulkan ishlarni amalga oshirganini milliy sportimiz jamoatchiligi also unutmaydi.

Mirabror Usmonov rahbarlik yillarida milliy sportimiz, xususan futbol Osiyo qitʼasida oʼz obroʼ va eʼtiboriga ega boʼldi. Jumladan, Oʼzbekiston yoshlar hamda oʼsmirlar terma jamoalari 5 bora Jahon chempionatlarida ishtirok etishga muvaffaq boʼldi. Qolaversa, mamlakatimiz turli yosh toifalarida 5 ta Osiyo chempionatiga mezbonlik qildi. Shuningdek, Mirabror Usmonov tashabbusi bilan yurtimizda mavjud infratuzilma ancha yaxshilandi, bir nechta stadionlar, sport inshootlari barpo etildi.

Yurt sporti rivoji yoʼlidagi xizmatlari uchun Mirabror Zufarovich “Mexnat shuxrati”, “El-yurt xurmati”, “Doʼstlik” ordenlari bilan taqdirlangan edi.

Mirabror Zufarovich 2006-2017 yillar mobaynida Oʼzbekiston futbol federatsiyasi rahbari sifatida, 2013-2017 yillarda Milliy Olimpiya qoʼmitasi, 2015-2018 yillar davomida esa Markaziy Osiyo futbol assotsiatsiyasi prezidenti sifatida samarali faoliyat olib bordi.

Mirabror Usmonovning oʼzbek futboli rivoji yoʼlida amalga oshirgan saʼy-harakatlari va u kishining yorqin xotirasi hamisha yodga olinadi.