Yurtdoshlarimiz orasida karantin davrida uyda qolib, jismoniy tarbiya va sport bilan shugʻullanishni faol targʻib qilish, shu orqali ularni sogʻlom turmush tarziga oshno etish maqsadida tashkil etilgan #uydaqol #hayotgaqoʻshil #sportchallenge chellenjida navbatdagi gʻolib va sovrindorlar aniqlandi.

Eʼtiborlisi, chellenj yurtdoshlarimizda katta qiziqish uygʻotdi. Avval boshda chellenjda 7 yoshdan 70 yeshgacha boʻlgan aholi qatnashishi kutilgandi. Ammo, chellenj tobora qizgʻin tus olishi natijasida unda endigina yurishni boshlagan goʻdakdan tortib hatto yoshi 80dan oshgan otaxon-u onaxonlar ham ishtirok etishdi. Xususan, navoiylik 87 yoshli Roziya aya sport bilan shugʻullanish yosh tanlamasligini, aksincha sport bilan shugʻullangan inson sogʻlom va tetik boʻlishini isbotladi.

6-apreldan start olgan mazkur chellenjga 6 mingdan ortiq video material yuborilgani tanlov yurtimiz aholisi orasida katta qiziqish uygʻotganini anglatadi.

#uydaqol #hayotgaqoʻshil #sportchallenge chellenjiga 22-26-aprel oraligʻida yuborilgan videoroliklar orasidan Hakamlar hayʼati eng yaxshi beshtasini tanlab oldi. Unga koʻra bitta 1-oʻrin hamda ikkitadan 2-3-oʻrin egalari taqdirlanadi. Taʼkidlash kerak, chellenjda ilk bora Samarqand, Jizzax hamda Sirdaryo viloyati vakillari sovrindorlar safidan joy olishdi.

Shu tariqa chellenjda gʻoliblik Navoiy viloyati Navoiy shahrida istiqomat qiluvchi Jabborovlar oilasiga nasib etdi.

2-oʻringa poytaxtlik Farmonqulovlar hamda Samarqand viloyati Narpay tumani Oqtosh shahrida yashovchi Rashidovlar oilasi loyiq koʻrildi.

Nihoyat faxrli 3-oʻrinni jizzaxlik Donishevlar hamda Sirdaryo viloyati Guliston shahridan Tashmetovlar oilasi band etishdi.

Biz chellenjning gʻolib va sovrindorlariga mukofotlar muborak boʻlsin, deb qolamiz.

Jismoniy tarbiya va sport vazirligi

Matbuot xizmati

Minsport.uz