2025-yilning fevral oyida Xitoyda 20 yoshgacha futbolchilar oʻrtasidagi Osiyo kubogi musobaqasi boʻlib oʻtadi. Oʻzbekiston yoshlar terma terma jamoasi guruh bosqichida Indoneziya, Yaman va Eron jamoalariga qarshi bahs olib boradi.

Ayni paytda vakillarimiz oʻquv-mashgʻulot yigʻinlari orqali mazkur musobaqaga tayyorgarlikni davom ettirmoqda. Bugun OʻFA rahbariyati yoshlar jamoamiz bilan uchrashdi. Unda jamoa oldida turgan ushbu musobaqa haqida fikr bildirilar ekan, Oʻzbekiston turnirning amaldagi gʻolibi ekanligi, terma jamoa bu gal ham musobaqada munosib ishtirok etgan holda Chilida oʻtadigan Jahon chempionatiga yoʻllanmani qoʻlga kiritishi zarurligi ta’kidlandi. Bu borada assotsiatsiyasi tomonidan barcha sharoitlar tashkil etib berilishi aytildi.

Oʻz oʻrnida jamoamizning bir qator yetakchi futbolchilari ham fikrlarini bildirib oʻtishdi. Murabbiylar shtabi bilan jamoaning ayni paytdagi holati va tayyorgarlik jarayoni haqida suhbatlashildi. Tibbiy shtabga futbolchilarning sogʻligi, tiklanishi va vitaminizatsiyalash jarayoni, shuningdek, futbolchilarga yuqori darajadagi tibbiy yordam koʻrsatish amaliyotini davom ettirish koʻrsatmasi berildi.

Eslatib oʻtamiz, jamoamiz 15, 18-noyabr kunlari Osiyo kubogining yana bir ishtirokchisi — Iroq yoshlar jamoasiga qarshi nazorat oʻyinlarida maydonga tushadi.