FIFA rasmiy sayti FIFA Forward dasturi doirasida yangilangan “Doʻstlik” stadioni majmuasi va milliy mashgʻulot markazi haqida haqida ma’lumot berdi va buni Oʻzbekistonda futbolni rivojlantirish borasida kelajakka yana bir katta qadam ekanligini qayd etdi.
Oʻzbekiston futbol assotsiatsiyasi (OʻFA) tashkil etilganidan buyon, yaʼni 1993-yildan beri oʻz mashgʻulot maydonchasiga ega boʻlmagan. Bu esa oʻz navbatida futbol jamoatchiligiga xizmat koʻrsatish va milliy terma jamoalarni xalqaro musobaqalarga munosib tarzda tayyorlash imkoniyatlarini cheklab qoʻygan edi, deyiladi xabarda.
OʻFA FIFA Forward dasturining moliyaviy koʻmagi asosida Oʻzbekistonda futbolning barcha sohalarini qoʻllab-quvvatlaydigan, milliy va mintaqaviy darajada targʻib qila oladigan xalqaro standartlarga javob beradigan obyektga ega boʻldi.
FIFAning 211 ta aʼzo assotsiatsiyasiga futbolga oid loyihalarni moliyalashtirishni taʼminlaydigan FIFA Forward dasturi koʻmagi asosida OʻFA endilikda futbol jamoatchiligiga keng koʻlamli xizmat koʻrsatishi mumkin boʻlgan obyekt bunyod etishga erishdi.
“Infratuzilma futbolni rivojlantirishdagi eng muhim ustunlaridan biridir. “Doʻstlik” milliy mashgʻulot markazi asosiy maydoni yoritish tizimining oʻrnatilishi — OʻFAga ushbu maydonda xalqaro va mahalliy oʻyinlarni oʻtkazish imkonini beradi”, — deydi FIFAning Osiyo va Okeaniya davlatlari assotsiatsiyasi direktori Sanjivan Balasingham.
“Sifatli yorugʻlik yuqori aniqlikda translyatsiya qilish imkonini beradi. OʻFA oʻz oʻrnida yoz faslining issiq kunlarida ham futbolchilar, rasmiylar va albatta tomoshabinlar uchun qulaylik yaratish uchun uchrashuvlarni maʼqul vaqtda oʻtkaza oladi. Biz mana shunday muvaffaqiyatli loyiha bilan OʻFAdagi doʻstlarimizni tabriklaymiz va kelajakda yana koʻplab dasturlar yuzasidan hamkorlik qilishga umid qilamiz”.
“Doʻstlik” stadioniga projektorlar oʻrnatilishi — Oʻzbekiston milliy mashgʻulot markazini rivojlantirishning 3-bosqichi boʻldi: loyiha dastlab uchta maydonni qurishdan boshlandi, asosiy stadion va tribunalarni taʼmirlash bilan davom etdi va asosiy maydonga projektorlar oʻrnatilishi bilan yakunlandi.
Endi yangilangan “Doʻstlik” stadioni Oʻzbekiston milliy terma jamoalarining bazasi boʻlib xizmat qiladi, ayollar terma jamoasi oʻyinlari shu yerda oʻtkaziladi. Hakamlar va murabbiylarga taʼlim berishda ushbu binodan foydalaniladi hamda klublar uchun ham keng imkoniyatlar taqdim etiladi.
2024-yilning oktyabr oyida yoritkichlar oʻrnatish tugallanganidan soʻng, stadion tungi mahalliy futbol oʻyinlari va xalqaro uchrashuvlarni qabul qilishga tayyor boʻladi. Yangilanishlar shuni anglatadiki, OʻFA endilikda Osiyo Futbol Konfederatsiyasi va Markaziy Osiyo futbol assotsiatsiyasi turnirlarini oʻtkazish talablariga javob beradigan maydonga ega hisoblanadi.
“Oʻzbekiston futbol assotsiatsiyasi va oʻzbek futbol jamoatchiligi nomidan “Doʻstlik” milliy mashgʻulot markazi stadionida projektorlar oʻrnatish loyihasini amalga oshirishdagi yordamingiz uchun samimiy minnatdorchilik bildiraman. Biz FIFAning doimiy yordami, mustahkam hamkorlik qilish tashabbusi va gʻoyalarini yuksak qadrlaymiz”, — deydi Oʻzbekiston futbol assotsiatsiyasi birinchi vitse-prezidenti Ravshan Irmatov.
“Biz ushbu loyiha tugallanganidan soʻng xalqaro standartlar asosida toʻgʻri yoritiladigan toʻrtta maydoni mavjud boʻlgan bebaho infratuzilmaga ega boʻlamiz. Bu esa, oʻz navbatida, barcha terma jamoalarimizni boʻlajak turnirlarga tayyorlashda katta yordam beradi. Qoʻllab-quvvatlaganingiz va fidoyiligingiz uchun yana bir bor rahmat!”.