Maʼlumki, Oʼzbekiston Jismoniy tarbiya va sport vazirligi hamda Milliy olimpiya qoʼmitasining qoʼshma qarori asosida Olimpiya sport turlari boʼyicha Oʼzbekiston milliy terma jamoalari uchun tashkil etilayotgan barcha oʼquv-mashgʼulot yigʼinlari vaqtincha toʼxtatildi.
Mashgʼulotlarning toʼxtalishi mamlakatimiz hududida qayd etilgan koronavirus pandemiyasining tarqalishini oldini olishga qaratilgan choralar hamda Xalqaro olimpiya qoʼmitasi tomonidan Tokio-2020 Olimpiadasini 2021 yilda oʼtkazish boʼyicha yakuniy qarorga kelgani sabab boʼldi.
Shundan kelib chiqib, Toshkent shahridagi «Paxtakor» qilichbozlik zalida oʼquv-mashgʼulot yigʼinini oʼtkazayotgan asosiy terma jamoamizning mashgʼulotlari muddatidan avval yakunlandi.
Kuni kecha terma jamoamiz aʼzolari oʼz uylariga sogʼ -salomat yetib olganliklarini aytishdi. Endilikda barcha qilichbozlarimiz oʼz uyida individual tarzda mashgʼulotlarni davom ettiradi.
Аziz hamyurtim, oʼzingiz va yaqinlaringizning salomatligi uchun uyda qoling!
MOQ – Olympic.uz